大家好！我返黎啦！
如果有留意我Facebook同IG update都知我上星期去左日本玩左一個星期～
今次突如其來的日本Trip玩得十分悠閒，沒有特別的行程路線安排，自由行的好處就係想去邊就去邊，想食咩就食咩～
今次旅遊地方都係東京，已經去了十多次東京，所以就算沒有旅遊書，我都好似返到自己熟悉的地方咁，想去邊就去邊，新宿池袋原宿等熱門地方我都行到熟哂～
去日本都經常都會大出血，買好多野返香港，不過今次一改大出血的習慣，變左去周圍食好野，原來唔覺唔覺我同男朋友係短短6日已經遊走左東京三大人氣Pancake店～
因為我跟男友太愛食Pancake，所以我都想急不及待跟大家分享！
1. GRAM
Gram係全日本不同地方都有分店，所以唔止東京先有～
而東京有三間分店，分別係自由が丘、原宿及吉祥寺！
講到最方便最近俾遊客去到當然就係原宿店，而我今次都係去左原宿店！
個個去GRAM都係為左係呢個招牌Premium Pancakes，不過原來唔係去到有位就有得食架～
每日分三個時段限量共60個，額滿即止，多一份都唔會多，遲左去就要明天請早啦！
食用時段分別係11:00／15:00／18:00，每個時段會派20個籌，而食用時段早一小時就會開始派籌及登記架啦！
我當日就下午3點45分左右盲中中就去左，去完先知係限量同限時，好彩等多一粒鐘左右就開始派籌，唯有去附近行下先～
到4點半左右我就返去排隊等派籌！
一人最多可以拎一個籌，我地兩個人，都係拎一個籌～
因為怕太大份一個人會食唔哂，但留意有最低消費，一人最少點一款食物／飲品先可以入座！
而拎籌既時間就可以順道Book埋幾點入座，咁Book左就可以早10分鐘去到就OK～又可以去附近地方行下～
我地入座時間係18:30，本來打算食Tea，就變左晚飯前小吃吧！哈哈！
Premium Pancakes係餐廳主打！
仲有其他唔同Pancakes款式，如果Lunch黎仲可以點Lunch Set tim～
因為我地想試多D唔同既野食，所以我地除左Premium Pancakes之外，就再叫多杯飲品！
因為佢地預先知道我地幾時入座，所以揀埋杯飲品就可以了～
好快有得食！
Premium Pancakes ￥950
終於上枱啦！
職員拎過黎都特別小心，因為Pancake太過震騰騰好易會倒下，終於安放到枱上要相機食先啦！
有3塊厚厚的Pancakes，上面有一球溫尼拿雪糕～
旁邊就仲有一舊Cream同焦糖醬！
Pancake有成約2吋厚，質地超級軟綿綿，真係可以用震騰騰黎形容～
伴住凍冰冰雪糕、Cream同焦糖醬食，口感超級豐富～
試過就咁食Pancakes，味道冇咁出～重點係加左焦糖醬，將成個蛋味帶出黎，食落又唔會入口即溶，有質感又有口感！
推薦度：★★★★★（五★為滿分）
玫瑰花茶 ￥450
另一款就點左壺玫瑰花茶，但係有點失望！
唔似我地平時飲既玫瑰花茶，無玫瑰花不突止，入面茶隔係一D橙色粒粒～
飲落味道唔知點解有陣蕃茄點酸的味道，奇怪！
我跟男友都唔太喜歡，不過最後都迫自己飲哂唔好浪費！
下次再黎都係叫返D正常野會比較穩陣！哈哈！
推薦度：☆☆☆☆☆（五★為滿分）
GRAM 原宿店
Website: http://www.cafe-gram.com/
地址：〒150-0001 東京都渋谷区神宮前1-9-30-1F
＊餐廳位於原宿竹下通附近，可以搭JR原宿駅，沿竹下通行到去見到7-11轉右就到
TEL：03-6804-3399
營業時間：OPEN. 11：00 – 21：00 不定休
2. Eggs 'n Things
呢間人氣Pancake我早幾年已經識佢，係一間長期都排滿人的Pancake店～
同樣係全國不同地區都有分店～
如果去東京最近就可以去原宿、台場或銀座分店，原宿我都經過幾次，次次都排滿人，真係冇動力去排，唯有放棄！
因為幾年前自己一個遊走東京時去過江之島，今次我帶了男友一齊去～
上次因為一到埗太肚餓就去左車站附近的McDonald食早餐，食過早餐後我再行下先發展到原來江之島係有一間Eggs 'n Things分店架！
重點係因為郊區，人流特別少，上次無緣一試，今次就決心帶男友來會一會佢！
不知為何日本特別重視Halloween這個節日，我地十月底去都不難在周圍見到南瓜裝飾～
進店時都係早上10點半左右，一大早餓住個肚坐左一小時車就來食早餐～
暫時都只是有不夠十枱人客，地方大座位都算多！
今次重點就來試一試它們的Pancakes，不過兩個人食兩份Pancakes好似好悶，所以另外點左一份其他的食物！
Halloween有期間限定，這個紫色的Pancakes好吸晴呀！
不過我還是想吃傳統的～
Strawberry Pancakes ￥1,080
這份Pancake有一座好似山咁高既Cream（睇見都覺得好邪惡），好震撼！
一碟有5塊Pancake，我選了士多啤梨味～
士多啤梨原來唔係新鮮的，是經過後期製作的士多啤梨粒加果醬，所以有點失望～
而Pancake薄薄的，跟平時McDonald食到既厚度差唔多，質感比較鬆軟，不過就無咩驚喜啦！
呢度有唔同既醬可以選擇，分別有焦糖、椰子及士多啤梨醬～
可以揀自己喜歡既去配埋Pancakes一齊食～
不過我覺得焦糖醬係最正常，其他就見人見致啦！
重點成座山既Cream上面就加左少少杏仁碎，Cream好香滑，是唯一可讚的地方！
推薦度：★★★☆☆（五★為滿分）
Canadian bacon Eggs Benedicts ￥1,350
另一款就點了煙肉Eggs Benedicts～
Eggs Benedicts煮到流心不錯，味道可接受，煙肉味不太香，比想像中遜色了～沒太大驚喜！
附上一埋連皮的薯仔粒，增加飽肚感！
推薦度：★★★☆☆（五★為滿分）
整體是可以接受的，正常的，但我唔覺得要花咁多時間去排隊食，去唔去食就自己考慮下啦！
Eggs 'n Things湘南江の島店
Website: https://www.eggsnthingsjapan.com/
地址：神奈川県藤沢市片瀬海岸2-17-23 the BEACH HOUSE 1F
＊小田急電鉄江ノ島線「片瀬江ノ島」駅徒歩3分
TEL：0466-54-0606
營業時間：9:00～22：30（Last Order 21：30）
3. Bills
相信大家愛好去日本的朋友都唔會對這間Bills 陌生，由4-5年前去日本發現到它，點知一試愛上，之後每次去東京都要去會一會佢！
它也有被喻為全世界最好味早餐的稱譽～
佢分店唔算多，東京、神奈川及福岡都有，去開呢D地方去旅行有機會就可以去試到！
去到行程最後一日，都要早起去Bills食早餐～
今次都係去左原宿表參道分店，呢間又就腳又方便，可以方便周圍行街Shopping～
之前去都係中午打後的時間，所以都係要等位的～
不過就無Eggs 'n Things咁慘要企係度等，佢會留低你名及人數，會叫你幾多點之後再黎再等一陣就可以入座，咁做都唔錯，唔洗人地企係度無了期咁等！
但今次我一大早9點就去到，唔洗等位就可以直入，所以建議唔想等位就最好9點半前去到，因為我地入到去不消15分鐘就坐滿8成人啦！
Ricotta Hotcakes, Fresh Banana, Honeycomb Butter ￥1,400
即叫即製，終於上枱啦～
因為時間尚早，所以好快就有得食～
一份有3件Hotcakes，唔好睇少3件，我之前跟朋友一人一碟，結果飽到上心口，一人食淨一件，所以自此之後就唔會做傻事啦～
今次都係點了一份Share食！
Hotcakes有一定的厚度，大約有1吋左右，仲有香蕉添！
Hotcakes質感比之前兩款的更濃密，中間好似夾左一點牛油咁，有點濕潤但唔會整到一Pat Pat！
每一件都會有這塊蜜糖味的牛油，再淋上焦糖Hotcake醬，唔好以為好甜，其實係剛剛好，每食一口都有幸福的感覺～這就是我每次都要來食既原因～
推薦度：★★★★★（五★為滿分）
Chilli Fried Egg and Bacon Brioche Roll,
Rocket, Spiced Mango Chutney ￥1,300
這個是店員介紹的是煙肉煎蛋同火箭菜麵包～
煎蛋是半熟的荷包蛋，煙肉好惹味，加埋有點青草味的火箭菜，口感豐富，店員果然無介紹錯！
推薦度：★★★★☆（五★為滿分）
Bills表参道
Website: http://bills-jp.net/jp
地址：〒150-0001 東京都渋谷区神宮前4-30-3 東急プラザ表参道原宿7F
＊餐廳位於表參道，行開原宿竹下通行過去10-15分鐘左右，再近D就可以搭METRO副都心線在明治神宮前駅下車比較近
TEL：03-5772-1133
營業時間：8:30 – 23:00, Last orders: food 10pm, drinks 10.30pm
親身去試過這三間人氣Pancakes食店，以下為我的推薦的總排名：
第一位：Bills
第二位：GRAMS
第三位：Eggs 'n Things
Bills依然係我心目中的第一位，佢個質感真係暫時係第二間食唔到，而GRAMS係我心目一排名都幾高，下次再去日本都會再去會一會佢，不過最麻煩就係要花時間等位，而最後Eggs 'n Things唔係唔好，只係佢長期Keep住排咁多人，等咁耐先有得食，但味道及質感真係冇驚喜，如果唔洗排隊我都會再去食，如果要等位我就唔會花時間去等！
希望跟我一樣喜歡食Pancakes又準備去東京的朋友可以參考一下啦～
下回再跟大家分享其他今次旅行的精彩行程及其他食店等等啦！Stay Tuned :)
*所有旅程洗費是自費的，純粹開心Share，謝謝你們花時間閱讀*
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
歡迎合作試用．邀稿．出席活動．化妝工作
Wing Ho
Facebook : www.facebook.com/fingyanwing.makeup
Instagram: FINGYANWING.MAKEUP
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
沒有留言:
張貼留言