準備好哂D大項目，開始要處理下令人煩惱的的細項了～
我都係隨心去搞，因為實在太多濕碎野了～
姊妹裙、兄弟衫搵左款，會訂返黎睇下實物如何，而之前就約左7月尾姊妹第一次見面會，因為我所有姊妹都係大家互相唔認識，想佢地早少少見一見，到時就更有默契啦！
而請帖亦都係走唔甩一個項目，我一開始完全冇諗過係香港印帖～
我個場本身都包帖，但係要自己拎出去印，佢個帖冇款（白色珍珠卡紙一張）之餘，仲要香港後印都要HK$5 UP一張（有經驗同事得知），所以我一開始訂場就已經放棄左佢地D帖，轉投淘淘懷抱，相信呢度好多新娘子都係淘淘訂帖架啦！平！靚！正！
我一開始搵帖就根據以下條件去搵：
- 以花/草為主 (小清新風格, 因為配合返婚宴場地)
- 顏色主要以紅/粉紅/綠色
- 可以自訂文字內容/排版, 可轉繁體字
- 一套連信封+主卡+副卡
- 最好人仔5蚊左右一套
我預大約印200-250份左右，個數目話多唔多話少唔少，始終都上拎上手睇下個實物係如何先至拍板，所以我就之前就搵左幾個心水款淘左D版返黎睇下實物，睇完之後真係好糾結呀！大家幫幫眼俾D意見我呀！
第一款
套裝：信封＋1主卡＋1副卡
價格：50套￥12.8@ / 120套￥8.8@ / 300套￥7.8@
另外同款設計仲有枱牌、封口貼紙、流程卡、對摺名牌（另外加錢）
呢款係一見鍾情，粉紅色信封，信封內頁有印花圖案，有花有草完完全全的我的菜♥
呢款個版係最後先收到，係因為佢個版係因為設計費問題，需要俾￥50先會寄兩款樣版你，仲要唔經淘淘，要另外經支付寶入數俾佢架～中間過程有D麻煩，幾經辛苦終於都收到佢呢款實物！
實物同我想像中既一樣，雖然價格比較貴，但我依然覺得好靚，主卡同副卡都是特種紙，可以寫字，質感有D紋理那款，不是令面的！
上面文字內容可以自訂，繁體字都可以，印花圖印好柔和好清新，完全是岩哂我婚禮個主題～
主卡的前後頁圖案就是這樣，除左圍案之外，字款同排版都可以自訂！
而副卡就可以轉換成相片及整作地圖（另也有提供同款地圖設計服務，收費另計，呢個我就冇問佢幾錢，約100元以上）
信封全是粉紅色的，而內頁打開就有同款印花，中間印下”Thank You”字眼，呢個款係Pinterest成日都見到，覺得好靚好特別～
心心眼程度：♥♥♥♥♥
性價比程度：♥♥
（5為滿分）
第二款
套裝：封套＋1貼卡(單面)＋1插卡
價格：50套￥9.8@ / 120套￥7.8@ （燙金加￥350起）
另外同款設計糖果回禮包裝盒（另外加錢￥2.8@,
200個起）
呢一款大紅色同岩岩果款好唔同Feel，不過我男人又覺得唔錯，又係同上面同一間的，上面講到￥50有2款樣版，我就拎埋呢款了！
雖然大紅色為主，但就同樣有花花草草，所以我都覺得可以睇一睇實物！
首先封套面有印新人的名字，未知佢呢個係唔係包埋，因為產品相片無呢個說明，預佢係淨色無野多，通常呢d都係要再加錢～
整個款式係唔錯～
中間係單面貼卡，以英文為主，左隔離插卡係一面中一面英，不過我覺得資料有少少重覆左～
而有燙金同冇燙金都真差差好遠，如果加埋燙金的話呢套請帖分分鐘仲貴過第一款，同埋一向對封套款縛帶的款式冇咩大好感，因為太多人用了！
心心眼程度：♥♥♥
性價比程度：♥♥
（5為滿分）
第三款
A套裝：信封＋1主卡＋1副卡（腰卡）＋吊牌＋封口貼紙＋絲帶
A價格：50套起￥5.8@
B套裝：1主卡＋1副卡（腰卡）＋吊牌＋絲帶
B價格：50套起￥4.5@
C套裝：內頁訂製信封＋1主卡＋封口貼紙
C價格：50套起￥7.8@
單張雙面主卡價格：50套起￥2.6@
呢個款都係以粉色花草設計為主，￥5.8@一套都唔算貴，我係睇中佢信封內頁係有圖案先至買個版黎睇～
呢間買版都係單套價格，再自費運費約人仔10-12元的！
呢個版同樣可以自訂字款、排版、中文字亦都可以用繁體字 ，整個色Tone都比較偏橙粉一點，沒第一款的太粉嫩～
這個款主卡是橫向的，圖案也是不可改動的～
主卡同副卡都是特種紙，啞面可以寫字，質感同樣有D紋理，有質感！
而這一套是附有Thank
you的封口貼紙，質感唔差～
而信封就是普通的橙紅色的珠光面信封，實物還不差，不過我最喜歡的信封內頁圖案要相對比較貴，所以這套不列入考慮範圍了～
心心眼程度：♥♥♥
性價比程度：♥♥♥♥
（5為滿分）
第四及五款
套裝：信封＋1主卡＋1副卡（腰卡）＋SAVE THE DATE吊牌＋封口貼紙＋絲帶
價格：30套起￥3.8@ / 100套起￥3.6@
/ 200套起￥3.4@
這間取版都係單價價錢，再自付運費，但送到黎收到好失望，因為不是一整套的樣版，缺少了信封，副卡及貼紙，不可以看齊一整套樣版～
佢呢款有好多個樣版排版可以選擇，分通用版同訂制版，通用版好似填充題咁只可以好似樣版咁填上資料，而訂制版入面的字，顏色，排版都可以隨意按個人喜好訂制，也附有同框線附圖可以自選，也可以加相片一併印製！
訂制版上的中文字都可以改繁體字的，而正面的一邊圖案式字句不可改內容的！
而拎
心心眼程度：♥
性價比程度：♥♥♥
（5為滿分）
第六款
套裝：信封＋1主卡＋1副卡（腰卡）＋SAVE THE DATE吊牌＋封口貼紙＋絲帶
價格：30套起￥3.8@ / 100套起￥3.6@
/ 200套起￥3.4@
這款同上面第4,5款同一間，價格都是一樣的，同樣是送少了，這一套只收到主卡一張=_=
風格設計其實係唔差的，都是有粉色及花草的圖案，不過質感都係比較薄，同埋店主寄漏配件俾我，印象已經唔好了，所以呢間都可以Out！
心心眼程度：♥♥
性價比程度：♥♥♥
（5為滿分）
第七款
套裝：信封＋1主卡＋1副卡（腰卡）＋吊牌＋絲帶
價格：20套起￥3.9@
這份成是以綠色為主，沒有花的元素，只有綠色的葉子圖案，因為我想要的風格的小清新，同我個場地都好夾～
全套都是只有兩色，正面同後面都有幾款排版及樣式可以選，中文字亦可以轉成繁體字～
而這套主卡同副卡都是用特種紙，啞面可以寫字，質感同樣有D紋理，算厚身有質感！
信封全是綠色的，而內頁打開就有同款設計的印花，其實都幾靚～
可以美中不足是信封面有好大隻Wedding
Invitation燙金字，問左店主唔可以改，咁收件人寫係邊度好？而男友覺得綠色卡好似聖誕卡，所以有點卻步了～
心心眼程度：♥♥♥
性價比程度：♥♥♥♥
（5為滿分）
第八款
套裝：信封＋1主卡＋1副卡（腰卡）＋吊牌＋絲帶
價格：20套起￥3.9@
最後呢款同第7款是同一間店的，所以價格是一樣～
包的配件也是一樣，而這款是粉紅色為主的！
呢款同上面果款都係一樣，有多個版面設計選擇，亦都可以轉成繁體字，而字質同上面大同小異～～
而設計的花花草草都幾靚，￥3.9有齊5件配件其實如果唔係佢個信封唔知點寫收件人個名之外，我應該都會訂佢了～
大家有冇咩意見，如果個信封係咁，收件人個姓果D寫係邊好，我諗左好耐都覺得寫係邊都係怪怪地！
心心眼程度：♥♥♥♥
性價比程度：♥♥♥♥♥
（5為滿分）
到宜家我仲未決定到訂邊款好，第1款我真係好鍾意架～但無奈佢訂1套基本都要HK$10一套，比我預算中貴左DD～
其實真係好雞肋，因為好多收到去完個婚宴就會掉，好似幾浪費同”Sign”錢咁～
大家又點睇呀？不如大家投下票俾D意見我呀！好苦惱！
而最近有同學仔Share左其實淘淘帖過黎，好似幾抵又唔差，我亦都訂緊返黎睇下個版係點，收到哂之後再同大家婚享吧！
以上都是我的用心分享，大家喜歡的就留個腳印👣支持下～你們的支持就是我婚享的原動力！多多指教！
沒有留言:
張貼留言